دبئی (ایم این این): پاکستان کے اولمپک گولڈ میڈلسٹ اور جیولن تھرو چیمپئن ارشد ندیم کو پیر کے روز دبئی میں منعقدہ ورلڈ اسپورٹس سمٹ کے دوران گلوبل بریک تھرو ایتھلیٹ ایوارڈ سے نوازا گیا۔
ایمریٹس نیوز ایجنسی کے مطابق دو روزہ سمٹ 29 اور 30 دسمبر کو منعقد ہو رہی ہے، جس میں دنیا بھر سے 1,500 سے زائد کھلاڑی، اسپورٹس رہنما اور پالیسی ساز شرکت کر رہے ہیں۔ سمٹ کا موضوع “کھیل کے ذریعے دنیا کو متحد کرنا” رکھا گیا ہے۔
وفاقی وزیر اطلاعات عطا اللہ تارڑ اور دیگر حکام نے ارشد ندیم کی اس کامیابی پر خوشی کا اظہار کیا۔ عطا اللہ تارڑ نے سوشل میڈیا پلیٹ فارم ایکس پر اپنے پیغام میں کہا کہ “ارشد ندیم ہم سب کے لیے باعثِ فخر ہیں۔”
ارشد ندیم نے اگست 2024 میں پیرس اولمپکس میں 92.97 میٹر کی تاریخی تھرو کے ساتھ پاکستان کے لیے جیولن تھرو میں پہلا اولمپک گولڈ میڈل جیت کر تاریخ رقم کی تھی۔
اولمپک کامیابی کے علاوہ ارشد ندیم کامن ویلتھ گیمز اور ایشین گیمز میں بھی تمغے حاصل کر چکے ہیں، جو ان کی عالمی سطح پر شاندار کارکردگی کا ثبوت ہے۔
نومبر 2025 میں انہوں نے سعودی عرب کے شہر ریاض میں منعقدہ اسلامی یکجہتی گیمز میں بھی 83.05 میٹر کی تھرو کے ساتھ سونے کا تمغہ جیت کر اپنی کامیابیوں میں مزید اضافہ کیا۔
