ڈیووس (ایم این این) — وزیراعظم شہباز شریف نے کہا ہے کہ پاکستان کی پائیدار معاشی ترقی کے لیے برآمدات پر مبنی حکمتِ عملی ہی واحد راستہ ہے، اور ملک کو آگے بڑھنے کے لیے اسی سمت میں پیش رفت کرنا ہوگی۔
ورلڈ اکنامک فورم کے موقع پر پاکستان پویلین میں ناشتے کی تقریب سے خطاب کرتے ہوئے وزیراعظم نے کہا کہ پاکستان واضح مقصد اور اعتماد کے ساتھ آگے بڑھ رہا ہے۔ انہوں نے مہنگائی میں کمی اور پالیسی ریٹ میں کمی کو مثبت پیش رفت قرار دیا۔
تاہم وزیراعظم نے تسلیم کیا کہ برآمدات کو مختلف چیلنجز درپیش ہیں اور سماجی اشاریوں میں بہتری کے لیے مسلسل مشترکہ کوششوں کی ضرورت ہے۔ ان کا کہنا تھا کہ تمام مشکلات کے باوجود راستہ بالکل واضح ہے اور پاکستان کو برآمدات پر مبنی ترقی اپنانا ہوگی۔
وزیراعظم نے بتایا کہ حکومت نے ریونیو کلیکشن کو ڈیجیٹل بنانے سمیت بنیادی ساختی اصلاحات متعارف کرائی ہیں۔ انہوں نے کہا کہ ٹیکس ٹو جی ڈی پی شرح دو سال قبل 9 فیصد تھی جو اب بڑھ کر 10.5 فیصد ہو گئی ہے، جو ایک اہم کامیابی ہے۔
انہوں نے کہا کہ پاکستان نے معدنیات کے شعبے میں بڑے پیمانے پر قدم رکھا ہے اور اس حوالے سے امریکی اور چینی کمپنیوں کے ساتھ معاہدے اور مفاہمتی یادداشتیں طے پائی ہیں۔ وزیراعظم کے مطابق گلگت بلتستان، آزاد کشمیر، خیبرپختونخوا اور بلوچستان میں قدرتی وسائل کے وسیع ذخائر موجود ہیں۔
وزیراعظم نے کرپٹو کرنسی، مصنوعی ذہانت اور آئی ٹی کے شعبوں میں تیز رفتار پیش رفت کا بھی ذکر کیا اور کہا کہ آئی ٹی برآمدات سہولتی پالیسیوں کے باعث بڑھ کر سالانہ تقریباً تین ارب ڈالر تک پہنچ چکی ہیں۔
نوجوانوں کے حوالے سے وزیراعظم نے کہا کہ وفاقی اور صوبائی حکومتوں نے ہنر مندی اور تربیتی پروگرامز شروع کیے ہیں، جس کے نتیجے میں پاکستانی نوجوان خلیجی ممالک اور دیگر خطوں میں باعزت روزگار حاصل کر رہے ہیں۔
امریکا کے ساتھ تعلقات پر بات کرتے ہوئے وزیراعظم نے امید ظاہر کی کہ دونوں ممالک معدنیات، انسداد دہشت گردی، آئی ٹی اور مصنوعی ذہانت کے شعبوں میں قریبی تعاون کریں گے۔ انہوں نے کہا کہ پاکستان زراعت، صنعت، معدنیات، آئی ٹی اور اے آئی میں تیزی سے ترقی کے دہانے پر ہے اور مستقبل نہایت روشن ہے۔
آئی ایم ایف سربراہ سے ملاقات
اس سے قبل وزیراعظم نے آئی ایم ایف کی منیجنگ ڈائریکٹر کرسٹالینا جارجیوا سے ملاقات کی، جنہوں نے پاکستان کی اصلاحاتی کوششوں کو سراہا اور اصلاحات کے تسلسل پر زور دیا۔ دونوں رہنماؤں نے عالمی معیشت اور ابھرتی معیشتوں کو درپیش چیلنجز پر بھی تبادلہ خیال کیا۔
فلسطینی وزیراعظم سے ملاقات
وزیراعظم نے فلسطینی وزیراعظم محمد مصطفیٰ سے بھی ملاقات کی، جنہوں نے فلسطینی عوام کی مستقل حمایت پر پاکستان کا شکریہ ادا کیا۔
دریں اثنا نائب وزیراعظم اور وزیر خارجہ اسحاق ڈار نے پاکستان پویلین کا افتتاح کیا اور مختلف عالمی رہنماؤں سے ملاقاتوں میں تجارت اور سرمایہ کاری سمیت دوطرفہ تعلقات کے فروغ پر زور دیا۔
