اسلام آباد (ایم این این): امریکی مشن برائے پاکستان نے 22 جنوری کو “لیٹ فریڈم رنگ” کے عنوان سے فریڈم 250 لبرٹی بیل اقدام کا باضابطہ آغاز لنکن کارنر اسلام آباد میں ایک تقریب کے دوران کیا۔
امریکہ کی قائم مقام سفیر نیٹلی اے بیکر نے تاریخی لبرٹی بیل کی مکمل جسامت کی نقل کی نقاب کشائی کی، جس کے ساتھ ہی امریکی آزادی کی 250ویں سالگرہ کے موقع پر تقریبات کے سلسلے کا آغاز کیا گیا۔ اس اقدام کا مقصد امریکی تاریخ میں سفارتکاری کے کردار اور عالمی اثرات کو اجاگر کرنا بھی ہے۔
1752 میں تیار کی گئی لبرٹی بیل امریکی آزادی اور جمہوریت کی ایک نمایاں علامت سمجھی جاتی ہے۔ فلاڈیلفیا میں موجود یہ گھنٹی امریکی انقلاب کے دوران اہم واقعات سے منسلک رہی اور 1787 میں امریکی آئین پر دستخط جیسے تاریخی مواقع پر بجائی گئی۔ آج یہ آزادی، انصاف اور مساوات جیسے امریکی اصولوں کی علامت ہے۔
تقریب سے خطاب کرتے ہوئے قائم مقام سفیر نیٹلی بیکر نے لبرٹی بیل کی تاریخی اہمیت اور غلامی کے خاتمے سمیت امریکی تاریخ کے اہم مراحل سے اس کے تعلق پر روشنی ڈالی۔ انہوں نے کہا کہ لنکن کارنر جیسے تعلیمی مرکز میں لبرٹی بیل کی نمائش خاص اہمیت رکھتی ہے، جہاں امریکہ اور اس کی بنیادی اقدار، بشمول آزادی اظہار، کے بارے میں آگاہی دی جاتی ہے۔
انہوں نے فلاڈیلفیا سے تعلق رکھنے والے امریکی سفارتکاروں کی خدمات کا بھی ذکر کیا اور کہا کہ ایسے تاریخی اور ذاتی روابط پاکستان اور امریکہ کے تعلقات کو مضبوط بناتے ہیں۔
“لیٹ فریڈم رنگ” اقدام کے تحت لبرٹی بیل کی 15 نقول پاکستان بھر کے لنکن کارنرز کو فراہم کی جائیں گی۔ مقامی فنکاروں اور طلبہ کو “میرے لیے آزادی کا مطلب” کے موضوع پر ان گھنٹیوں کو رنگنے کی دعوت دی جائے گی۔
ان تخلیقی فن پاروں کو رواں سال پاکستان میں امریکی یومِ آزادی کی تقریبات کے دوران نمائش کے لیے پیش کیا جائے گا، جبکہ ان پر مبنی ایک خصوصی ویڈیو بھی امریکی سفارت خانے کی جانب سے جاری کی جائے گی، جس میں پاکستانی نوجوانوں کی تخلیقی صلاحیتوں کو اجاگر کیا جائے گا۔
