ڈیووس (ایم این این): امریکی صدر ڈونلڈ ٹرمپ نے ہفتے کے روز چین کے ساتھ ممکنہ تجارتی معاہدے پر کینیڈا کو سخت انتباہ جاری کرتے ہوئے کہا ہے کہ ایسے کسی بھی معاہدے کی صورت میں کینیڈین مصنوعات پر 100 فیصد ٹیرف عائد کر دیا جائے گا۔
ٹروتھ سوشل پر جاری بیان میں صدر ٹرمپ نے کینیڈین وزیراعظم مارک کارنی کو خبردار کیا کہ بیجنگ کے ساتھ قریبی تجارتی تعلقات کینیڈا کے لیے سنگین خطرات کا باعث بن سکتے ہیں۔ انہوں نے دعویٰ کیا کہ چین کینیڈا کے کاروباری ڈھانچے، معاشرتی نظام اور طرزِ زندگی کو شدید نقصان پہنچا سکتا ہے۔
ٹرمپ نے کہا کہ اگر کینیڈا نے چین کے ساتھ تجارتی معاہدہ کیا تو امریکہ فوری طور پر کینیڈین اشیا پر سخت تجارتی پابندیاں نافذ کرے گا۔
انہوں نے حالیہ دورۂ چین کے دوران مارک کارنی کے اس بیان کا حوالہ دیا، جس میں انہوں نے چین کو ایک قابلِ اعتماد اور پیش گوئی کے قابل شراکت دار قرار دیا تھا، اور الزام عائد کیا کہ چین کینیڈا کو امریکی ٹیرف سے بچنے کے لیے استعمال کرنا چاہتا ہے۔
صدر ٹرمپ نے کہا کہ اگر کینیڈا کو چین کی مصنوعات کے لیے امریکہ میں داخلے کا راستہ بنانے کی کوشش کی گئی تو واشنگٹن اس کی اجازت نہیں دے گا۔
امریکہ اور کینیڈا کے تعلقات میں حالیہ دنوں میں مزید کشیدگی دیکھی گئی ہے۔ جمعرات کو صدر ٹرمپ نے عالمی تنازعات کے حل کے لیے قائم اپنے بورڈ آف پیس اقدام میں کینیڈا کی شمولیت کی دعوت واپس لے لی تھی۔
یہ فیصلہ عالمی اقتصادی فورم ڈیووس میں وزیراعظم کارنی کی تقریر کے بعد سامنے آیا، جس میں انہوں نے طاقتور ممالک پر معاشی انضمام کو ہتھیار بنانے اور ٹیرف کو دباؤ کے آلے کے طور پر استعمال کرنے پر تنقید کی تھی۔
