اسلام آباد (ایم این این) – پاکستان میں چین کے سفیر جیانگ زائی دونگ نے کہا ہے کہ چین اور پاکستان معدنی شعبے میں تعاون کو ایک نئی سطح پر لے جانا چاہتے ہیں، جس میں معدنیات کی تلاش اور کان کنی کے ساتھ ساتھ مکمل ویلیو چین کو شامل کیا جائے گا۔
اسلام آباد میں منعقدہ چین پاکستان منرل کوآپریشن فورم سے خطاب کرتے ہوئے چینی سفیر نے کہا کہ حالیہ برسوں میں یہ دونوں ممالک کا پہلا معدنی موضوع پر مبنی فورم ہے، جس کا مقصد عملی اور نتیجہ خیز تعاون کو فروغ دینا ہے۔
انہوں نے کہا کہ چین پاکستان تعاون کو صرف خام معدنیات کے حصول تک محدود نہیں رکھنا چاہتا بلکہ مشینری، سمیلٹنگ، پراسیسنگ، تجارت، لاجسٹکس، فنانس، تحقیق اور تربیت جیسے شعبوں تک پھیلانا چاہتا ہے۔ اس سے پاکستان کو خام مال کی برآمدات کے بجائے مقامی پراسیسنگ اور ویلیو ایڈڈ صنعت کی جانب بڑھنے میں مدد ملے گی۔
چینی سفیر نے کہا کہ پاکستان معدنی وسائل سے مالا مال ہے، تاہم زیادہ تر چھوٹے اور درمیانے درجے کے منصوبے سرمایہ، ٹیکنالوجی اور افرادی قوت کی کمی کا شکار ہیں۔ انہوں نے کہا کہ چینی کمپنیاں پاکستان کی معدنی صلاحیت کو بروئے کار لانے اور پائیدار معاشی ترقی کے لیے سرمایہ کاری اور ٹیکنالوجی فراہم کرنے کے لیے تیار ہیں۔
ماحولیات کے تحفظ پر زور دیتے ہوئے جیانگ زائی دونگ نے کہا کہ چین گرین مائننگ کے تصور کو فروغ دیتا ہے اور پاکستان میں بھی ماحول دوست کان کنی کی حوصلہ افزائی کرتا ہے۔ انہوں نے ددّر منصوبے کو گرین مائننگ کی کامیاب مثال قرار دیا۔
انہوں نے کہا کہ معدنی ترقی کے ساتھ ماحولیاتی تحفظ کو یقینی بنانا ضروری ہے اور اس ضمن میں ماحولیاتی جائزوں، بحالی اور سائنسی کان کنی کے طریقوں پر عمل کیا جانا چاہیے۔
مقامی آبادی کے حوالے سے انہوں نے کہا کہ چین چاہتا ہے کہ معدنی منصوبوں کے فوائد براہ راست مقامی لوگوں تک پہنچیں۔ انہوں نے سائنڈک منصوبے کا حوالہ دیتے ہوئے کہا کہ اس منصوبے کے ذریعے ہزاروں پاکستانیوں کو فنی اور انتظامی تربیت دی گئی۔
چینی سفیر نے کہا کہ چین اور پاکستان اپنے ترقیاتی منصوبوں کے درمیان ہم آہنگی بڑھاتے ہوئے دوطرفہ تعلقات کو مزید مضبوط بنانا چاہتے ہیں اور معدنی تعاون کو مستقبل میں ایک نئی مثال بنانا چاہتے ہیں۔
