واشنگٹن (ایم این این) — چینی صدر شی جن پنگ اور امریکی صدر ڈونلڈ جے ٹرمپ کے درمیان ٹیلی فون پر بات چیت ہوئی جس میں چین اور امریکا کے تعلقات کے مستقبل پر تبادلہ خیال کیا گیا۔
صدر شی جن پنگ نے کہا کہ گزشتہ ایک سال کے دوران دونوں ممالک کے درمیان مؤثر رابطہ رہا اور بوسان میں ہونے والی ملاقات کامیاب ثابت ہوئی، جس نے چین امریکا تعلقات کی سمت اور لائحہ عمل طے کرنے میں مدد دی۔ ان کے مطابق اس پیش رفت کو دونوں ممالک کے عوام اور عالمی برادری نے سراہا۔
نئے سال کے حوالے سے صدر شی نے امید ظاہر کی کہ وہ صدر ٹرمپ کے ساتھ مل کر چین امریکا تعلقات کی کشتی کو مشکلات اور چیلنجز کے باوجود آگے بڑھائیں گے اور مثبت و تعمیری نتائج حاصل کریں گے۔ انہوں نے کہا کہ جس طرح امریکا کے اپنے تحفظات ہیں، اسی طرح چین کے بھی کچھ خدشات ہیں، اور چین اپنے وعدوں پر قائم رہتا ہے اور عملی اقدامات کے ذریعے نتائج دکھاتا ہے۔
صدر شی نے زور دیا کہ اگر دونوں فریق برابری، باہمی احترام اور مشترکہ مفاد کے اصولوں پر ایک ہی سمت میں آگے بڑھیں تو ایک دوسرے کے خدشات کا حل نکالا جا سکتا ہے۔ انہوں نے کہا کہ دونوں ممالک کو طے شدہ مشترکہ نکات پر عمل کرنا، مکالمہ اور رابطہ بڑھانا، اختلافات کو مناسب طریقے سے سنبھالنا اور عملی تعاون کو وسعت دینا چاہیے۔
صدر شی جن پنگ کا کہنا تھا کہ اعتماد کی بتدریج تعمیر ہی درست راستہ ہے، اور امید ظاہر کی کہ 2026 دونوں بڑی طاقتوں کے درمیان باہمی احترام، پرامن بقائے باہمی اور مشترکہ فائدے پر مبنی تعاون کا سال ثابت ہوگا۔
