ویب ڈیسک (ایم این این) – روس کے سفیر البرٹ پی خوریف نے کہا ہے کہ اس وقت روس کی ترجیح پاکستان کے ساتھ علاقائی سلامتی اور بین الاقوامی دہشت گردی کے خلاف تعاون کو فروغ دینا ہے، جبکہ اقوام متحدہ اور شنگھائی تعاون تنظیم (ایس سی او) جیسے کثیرالجہتی فورمز پر بھی قریبی رابطہ رکھا جا رہا ہے۔
خبر رساں ادارے ٹاس کو دیے گئے انٹرویو میں روسی سفیر نے کہا کہ دونوں ممالک کے شہروں اور خطوں کے درمیان تعاون کے وسیع امکانات موجود ہیں۔ انہوں نے بتایا کہ روس کے ماسکو، جمہوریہ تاتارستان اور پرائمورسکی کرائی جبکہ پاکستان کے پنجاب اور سندھ نے اس سلسلے میں دلچسپی ظاہر کی ہے۔
سفیر خوریف کے مطابق روس تعلیم، سائنس اور ثقافت کے شعبوں میں تعلقات مضبوط بنانے پر خصوصی توجہ دے رہا ہے۔ پاکستان میں روسی زبان کے فروغ کے لیے “روسی اساتذہ بیرون ملک” منصوبے کے تحت اقدامات کیے جا رہے ہیں، جبکہ مشترکہ سائنسی کانفرنسوں، ثقافتی اور کھیلوں کی سرگرمیوں کا بھی انعقاد کیا جا رہا ہے۔
انہوں نے کہا کہ آنے والے برسوں میں باہمی تجارت کے فروغ، متبادل ادائیگی نظام کی تیاری اور بڑے مشترکہ منصوبوں پر عمل درآمد انتہائی اہم ہے۔ ان منصوبوں میں پاکستان اسٹیل ملز کی بحالی، روس اور پاکستان کے درمیان ریلوے رابطے، پن بجلی کے منصوبوں میں تعاون اور انسولین سمیت ادویات کی مشترکہ پیداوار شامل ہے۔
روسی سفیر نے کہا کہ پاکستان تیل کی تلاش اور پیداوار میں روس کے ساتھ تعاون کا خواہاں ہے اور روس پاکستان کی توانائی خودمختاری مضبوط بنانے میں مدد کے لیے تیار ہے۔ انہوں نے یاد دلایا کہ 1960 کی دہائی میں سابق سوویت یونین نے پاکستان کی سرکاری آئل اینڈ گیس ڈویلپمنٹ کمپنی لمیٹڈ کے قیام میں مدد کی تھی اور متعدد تیل و گیس کے ذخائر کی دریافت میں بھی کردار ادا کیا تھا۔
انہوں نے شنگھائی تعاون تنظیم کے فریم ورک کے تحت پاکستان کے ساتھ تعمیری تعاون کو سراہتے ہوئے کہا کہ علاقائی سلامتی، دہشت گردی اور سرحد پار منظم جرائم کے خلاف جنگ دونوں ممالک کی مشترکہ ترجیحات ہیں۔
سفیر خوریف نے کہا کہ روس پاکستان کی برکس میں شمولیت میں دلچسپی کا خیرمقدم کرتا ہے، جبکہ نیو ڈویلپمنٹ بینک میں پاکستان کی شمولیت برکس کے ساتھ انضمام کی جانب ایک عملی قدم ہو سکتی ہے۔
روسی سفارتی دن کے موقع پر، جو 10 فروری کو منایا جاتا ہے، روسی سفیر نے ماسکو اور بیرون ملک تعینات اپنے ساتھیوں کو صحت، خوشی اور عالمی سطح پر روس کے مؤقف کے فروغ میں کامیابی کی دعا دی۔
