نیویارک (ایم این این): آن لائن تجارتی کمپنی eBay نے استعمال شدہ ملبوسات کی معروف مارکیٹ پلیس Depop کو Etsy سے تقریباً ایک اعشاریہ دو ارب ڈالر نقد میں خریدنے کا معاہدہ کر لیا ہے۔ کمپنیوں نے بدھ کے روز اس فیصلے کا اعلان کیا۔
یہ پیش رفت ایسے وقت میں سامنے آئی ہے جب استعمال شدہ کپڑوں کی مانگ میں نمایاں اضافہ دیکھا جا رہا ہے۔ صارفین کم قیمت اور منفرد اشیا کی تلاش کے ساتھ ساتھ ماحول دوست خریداری کے رجحان کو بھی فروغ دے رہے ہیں تاکہ قابل استعمال سامان کو کوڑے کے ڈھیر میں جانے سے روکا جا سکے۔
ای بے کے چیف ایگزیکٹو آفیسر جیمی ایانونے نے بیان میں کہا کہ یہ معاہدہ نوجوان نسل، خصوصاً جنریشن زیڈ، تک رسائی بڑھانے کا اہم موقع فراہم کرتا ہے۔ ان کے مطابق ای بے کے وسیع نیٹ ورک، آپریشنل صلاحیتوں اور تکمیلی پیشکشوں سے ڈی پاپ کو طویل مدتی ترقی میں مدد ملے گی۔
مشترکہ اعلامیے کے مطابق اکتیس دسمبر دو ہزار پچیس تک ڈی پاپ کے سات ملین فعال خریدار تھے، جن میں سے تقریباً نوے فیصد کی عمر چونتیس برس سے کم ہے، جبکہ تین ملین سے زائد فعال فروخت کنندگان بھی پلیٹ فارم پر موجود ہیں۔
یہ معاہدہ پانچ برس بعد سامنے آیا ہے جب ایٹسی نے ڈی پاپ کو ایک اعشاریہ چھ ارب ڈالر میں خریدا تھا۔ دو ہزار گیارہ میں قائم ہونے والی یہ ایپ نوجوان صارفین میں خاصی مقبول رہی ہے۔
کیلیفورنیا کے شہر سان ہوزے میں قائم ای بے نے کہا ہے کہ ادائیگی مکمل طور پر نقد کی جائے گی۔ جبکہ نیویارک کے بروکلین میں قائم ایٹسی اس رقم کو عمومی کارپوریٹ مقاصد، شیئرز کی واپسی اور اپنے بنیادی مارکیٹ پلیس میں سرمایہ کاری کے لیے استعمال کرے گی۔
کمپنیوں کے مطابق دونوں اداروں کے بورڈ آف ڈائریکٹرز نے متفقہ طور پر اس لین دین کی منظوری دے دی ہے اور توقع ہے کہ ضابطہ جاتی منظوریوں کے بعد یہ معاہدہ سال کی دوسری سہ ماہی میں مکمل ہو جائے گا۔
اعلان کے بعد ای بے کے حصص میں سات فیصد سے زائد اضافہ ہوا، جبکہ ایٹسی کے شیئرز بعد از اوقات تجارت میں تقریباً پندرہ فیصد تک بڑھ گئے۔
