اسپورٹس ڈیسک (ایم این این): نیوزی لینڈ کے بلے باز فن ایلن نے شاندار بیٹنگ کا مظاہرہ کرتے ہوئے ٹی ٹوئنٹی ورلڈ کپ کی تاریخ کی تیز ترین سنچری بنا ڈالی اور اپنی ٹیم کو جنوبی افریقہ کے خلاف نو وکٹوں سے بڑی فتح دلا کر فائنل میں پہنچا دیا۔
کولکتہ میں کھیلے گئے پہلے سیمی فائنل میں 170 رنز کے ہدف کے تعاقب میں فن ایلن نے صرف 33 گیندوں پر ناقابل شکست 100 رنز اسکور کیے اور کرس گیل کا 47 گیندوں پر سنچری بنانے کا سابقہ ریکارڈ توڑ دیا۔ نیوزی لینڈ نے 7.1 اوورز پہلے ہی ہدف حاصل کر لیا۔
ایڈن گارڈنز میں فن ایلن نے مسلسل باؤنڈریز لگا کر نہ صرف اپنی سنچری مکمل کی بلکہ میچ بھی جتوا دیا۔ ان کی اننگز میں آٹھ چھکے اور دس چوکے شامل تھے۔
اوپننگ ساتھی ٹم سیفرٹ نے بھی 58 رنز کی جارحانہ اننگز کھیلی اور دونوں کے درمیان صرف 9.1 اوورز میں 117 رنز کی شراکت قائم ہوئی، جس نے فتح کی بنیاد رکھ دی۔
فن ایلن نے کہا کہ ٹیم کا منصوبہ ابتدا سے ہی حریف کو دباؤ میں لانا تھا اور ٹم سیفرٹ کی جارحانہ بیٹنگ نے انہیں آزادی کے ساتھ کھیلنے کا موقع دیا۔
نیوزی لینڈ، جو نیٹ رن ریٹ کی بنیاد پر سیمی فائنل میں پہنچا تھا اور اپنے پہلے ٹی ٹوئنٹی ورلڈ کپ ٹائٹل کی تلاش میں ہے، اب احمد آباد میں اتوار کو ہونے والے فائنل میں بھارت یا انگلینڈ کا سامنا کرے گا۔
اس سے قبل کپتان مچل سینٹنر نے پہلے فیلڈنگ کا فیصلہ کیا۔ اسپنرز راچن رویندرا اور کول میکونچی نے دو دو وکٹیں لے کر جنوبی افریقہ کو 169 رنز تک محدود رکھا۔
جنوبی افریقہ، جس کی قیادت ایڈن مارکرم کر رہے تھے، ٹورنامنٹ میں ناقابل شکست تھا مگر 77 رنز پر پانچ وکٹیں گنوا بیٹھا۔ مارکو جانسن نے ناقابل شکست 55 رنز بنا کر ٹیم کو سنبھالا دیا۔
میکونچی نے کوئنٹن ڈی کوک اور ریان رکلٹن کو مسلسل گیندوں پر آؤٹ کیا جبکہ راچن رویندرا نے مارکرم اور ڈیوڈ ملر کی وکٹیں حاصل کیں۔ ڈیرل مچل نے اہم کیچز پکڑے۔
جمی نیشم نے ڈیوالڈ بریوس کی 34 رنز کی اننگز کا خاتمہ کیا جبکہ لاکی فرگوسن نے ٹرسٹن اسٹبس کو آؤٹ کیا۔ فاسٹ بولر میٹ ہنری نے 34 رنز دے کر دو وکٹیں حاصل کیں۔
مچل سینٹنر نے کہا کہ اہم میچ میں اس طرح کی کارکردگی انتہائی خوش آئند ہے۔ ایڈن مارکرم نے اعتراف کیا کہ ابتدائی اوورز میں کنڈیشنز مشکل تھیں اور رنز بنانا آسان نہیں تھا۔
