امریکی صدر ڈونلڈ ٹرمپ نے پیر کو کہا کہ انہوں نے بھارتی وزیر اعظم نریندر مودی کو پاکستان کے ساتھ جنگ سے گریز کا مشورہ دیا، اس بات پر زور دیتے ہوئے کہ مسائل کا حل تجارت اور سفارت کاری کے ذریعے ممکن ہے۔
وائٹ ہاؤس میں دیوالی کی تقریب کے دوران صحافیوں سے گفتگو کرتے ہوئے ٹرمپ نے بتایا کہ ان کی مودی سے فون پر بات چیت ہوئی جس میں تجارت سمیت دیگر امور زیر بحث آئے۔
ٹرمپ نے کہا، ’’ہم نے کئی باتیں کیں، زیادہ تر تجارت کے حوالے سے۔ میں نے انہیں کہا کہ پاکستان کے ساتھ جنگ نہیں ہونی چاہیے، مسائل تجارت سے حل ہو سکتے ہیں۔‘‘
انہوں نے دعویٰ کیا کہ انہوں نے اپنے دورِ صدارت میں آٹھ ممکنہ جنگوں کو ’’سودوں اور تجارت‘‘ کے ذریعے روکا، جن میں ایک پاک بھارت تنازع بھی شامل تھا۔
ٹرمپ کے مطابق ’’پاک بھارت جھڑپ کے دوران سات طیارے گرائے گئے۔ میں نے دونوں ممالک کو فون کر کے کہا کہ اگر وہ جنگ کرتے ہیں تو امریکہ ان سے تجارت بند کر دے گا۔ چوبیس گھنٹوں میں دونوں نے کہا کہ وہ لڑنا نہیں چاہتے۔‘‘
ٹرمپ اس سے قبل بھی کئی بار کہہ چکے ہیں کہ انہوں نے پاکستان اور بھارت کے درمیان کشیدگی کم کرنے میں کردار ادا کیا ہے۔
