وفاقی وزیر داخلہ محسن نقوی نے بدھ کے روز اعلان کیا کہ خیبر پختونخوا کے لیے مختص بلٹ پروف گاڑیاں اب بلوچستان بھیجی جائیں گی تاکہ صوبے میں انسداد دہشت گردی کے اقدامات کو مزید مؤثر بنایا جا سکے۔
سماجی رابطے کی ویب سائٹ ایکس (سابقہ ٹوئٹر) پر جاری بیان میں محسن نقوی نے کہا کہ خیبر پختونخوا کے لیے مخصوص کی گئی گاڑیاں اب بلوچستان منتقل کی جا رہی ہیں۔
انہوں نے کہا کہ بلوچستان کی سیکیورٹی فورسز اور پولیس نے دہشت گردی کے خلاف بے پناہ قربانیاں دی ہیں، اور بلٹ پروف گاڑیوں کی فراہمی ان کی صلاحیتوں اور تحفظ میں مزید اضافہ کرے گی۔
یہ اعلان بلوچستان کے وزیر اعلیٰ سرفراز بگٹی کے اس بیان کے بعد سامنے آیا جس میں انہوں نے کہا تھا کہ بلوچستان بھی دہشت گردی سے خیبر پختونخوا کی طرح شدید متاثر ہوا ہے اور مؤثر کارروائیوں کے لیے اضافی حفاظتی سازوسامان کی ضرورت ہے۔
سرفراز بگٹی نے کہا کہ شہریوں کی حفاظت صوبائی حکومت کی اولین ترجیح ہے اور اس مقصد کے لیے سیکیورٹی اقدامات کو مزید سخت کیا جا رہا ہے۔
چند روز قبل وفاقی وزیر داخلہ محسن نقوی نے تین بلٹ پروف گاڑیاں خیبر پختونخوا پولیس کے حوالے کی تھیں، تاہم نو منتخب وزیر اعلیٰ خیبر پختونخوا سہیل آفریدی نے انہیں قبول کرنے سے انکار کر دیا اور پولیس کو ہدایت کی کہ گاڑیاں وفاقی حکومت کو واپس کی جائیں۔
سہیل آفریدی نے دعویٰ کیا تھا کہ گاڑیاں غیر معیاری ہیں اور صوبائی حکومت اپنی وسائل سے نئی گاڑیاں اور اضافی سہولیات فراہم کرے گی۔
دوسری جانب سرکاری ذرائع کا کہنا ہے کہ اگرچہ یہ گاڑیاں نئی نہیں ہیں، تاہم وہ مکمل طور پر آپریشنل اور سیکیورٹی فرائض کے لیے موزوں ہیں۔
