اسلام آباد (ایم این این): وفاقی حکومت نے جمعہ کے روز پیٹرول اور ہائی اسپیڈ ڈیزل کی قیمتوں میں فی لیٹر 55 روپے کا بڑا اضافہ کر دیا جس کی وجہ عالمی منڈی میں تیل کی قیمتوں میں اضافہ اور مشرق وسطیٰ میں جاری کشیدگی کو قرار دیا گیا ہے۔
اضافے کے بعد پیٹرول کی ایکس ڈپو قیمت 266.17 روپے سے بڑھا کر 321.17 روپے فی لیٹر مقرر کر دی گئی ہے جو تقریباً 17 فیصد اضافہ بنتا ہے، جبکہ ہائی اسپیڈ ڈیزل کی ایکس ڈپو قیمت آئندہ ہفتے کے لیے 335.86 روپے فی لیٹر مقرر کی گئی ہے۔
اس فیصلے کا اعلان وفاقی وزیر پیٹرولیم علی پرویز ملک نے ایک پریس کانفرنس کے دوران کیا جس میں نائب وزیراعظم اور وزیر خارجہ اسحاق ڈار اور وزیر خزانہ محمد اورنگزیب بھی موجود تھے۔
اسحاق ڈار نے کہا کہ نئی قیمتوں کا اطلاق ہفتہ کی رات بارہ بجے سے ہو جائے گا۔
انہوں نے کہا کہ ایران، امریکہ اور اسرائیل کے درمیان جاری جنگ نے پورے خطے کو متاثر کیا ہے اور اس کے باعث عالمی منڈی میں پیٹرولیم مصنوعات کی قیمتوں میں 50 سے 70 فیصد تک اضافہ دیکھنے میں آیا ہے۔
اسحاق ڈار کے مطابق کئی ممالک میں عالمی قیمتوں میں اضافے کے باعث خودکار طور پر پیٹرولیم مصنوعات مہنگی ہو گئی ہیں تاہم پاکستان میں وزیراعظم شہباز شریف نے صورتحال کا بغور جائزہ لینے کے بعد فیصلہ کیا ہے۔
انہوں نے بتایا کہ گزشتہ دو سے تین ہفتوں سے وزیراعظم مسلسل اجلاس کر کے عالمی صورتحال کا جائزہ لے رہے تھے جبکہ وفاقی وزیر پیٹرولیم علی پرویز ملک اور وزیر خزانہ محمد اورنگزیب کی سربراہی میں قائم مستقل کمیٹی بھی باقاعدگی سے صورتحال کا جائزہ لے رہی تھی۔
اسحاق ڈار نے کہا کہ ان کی سربراہی میں ایک اور کمیٹی تشکیل دی گئی جس میں علی پرویز ملک اور محمد اورنگزیب شامل تھے اور اس کمیٹی نے متعلقہ اداروں سے مشاورت کر کے کوشش کی کہ عالمی قیمتوں کے اثرات عوام تک کم سے کم منتقل ہوں۔
انہوں نے مزید کہا کہ پاکستان مشرق وسطیٰ میں کشیدگی کم کرنے کے لیے دیگر ممالک کے ساتھ سفارتی رابطے بھی کر رہا ہے۔ وزیراعظم شہباز شریف اور چیف آف ڈیفنس فورسز اور آرمی چیف فیلڈ مارشل عاصم منیر بھی مختلف ممالک کی سیاسی اور عسکری قیادت سے رابطے میں ہیں۔
وزیر خزانہ محمد اورنگزیب نے کہا کہ وزیراعظم کی تشکیل کردہ کمیٹی گزشتہ پانچ دنوں سے روزانہ اجلاس کر رہی ہے اور صورتحال کا مسلسل جائزہ لیا جا رہا ہے۔
انہوں نے کہا کہ توانائی اور پاکستان کی معیشت ایک دوسرے سے گہرا تعلق رکھتی ہیں اس لیے حکومت مشرق وسطیٰ کے بحران کے معاشی اثرات کا بھی جائزہ لے رہی ہے۔
محمد اورنگزیب کے مطابق اس وقت پاکستان معاشی استحکام کے حوالے سے بہتر صورتحال میں ہے اور گھبراہٹ کی کوئی ضرورت نہیں، تاہم حکومت ممکنہ حالات کے لیے پیشگی منصوبہ بندی کر رہی ہے۔
انہوں نے کہا کہ ایندھن کی طلب اور استعمال کو منظم کرنا آئندہ دنوں میں اہم کردار ادا کرے گا اور وفاقی حکومت جلد چاروں صوبوں کے وزرائے اعلیٰ کے ساتھ اجلاس کر کے مشترکہ حکمت عملی طے کرے گی۔
وفاقی وزیر پیٹرولیم علی پرویز ملک نے کہا کہ ملک اس وقت غیر معمولی حالات سے گزر رہا ہے اور خطے میں بھڑکنے والی آگ نے پورے علاقے کو اپنی لپیٹ میں لے لیا ہے۔
انہوں نے کہا کہ آبنائے ہرمز میں جہازوں کی سرگرمیاں متاثر ہونے سے عالمی تیل کی فراہمی کو خطرات لاحق ہو گئے ہیں۔
علی پرویز ملک کے مطابق وزیراعظم شہباز شریف نے سعودی حکومت سے رابطہ کیا ہے جبکہ وزارت خارجہ بھی توانائی کی متبادل فراہمی کے انتظامات میں معاونت کر رہی ہے۔
انہوں نے بتایا کہ پاکستان نیشنل شپنگ کارپوریشن کے دو جہاز ینبع اور فجیرہ کی بندرگاہوں کی جانب روانہ ہو چکے ہیں تاکہ پاکستان کی توانائی کی ضروریات پوری کی جا سکیں۔
انہوں نے مزید کہا کہ سعودی آرامکو نے بھی یقین دہانی کرائی ہے کہ اگر پاکستان بڑا جہاز فراہم کرے تو ینبع سے خام تیل لوڈ کر کے پاکستان تک پہنچایا جا سکتا ہے تاکہ مقامی ریفائنریوں کو مسلسل سپلائی جاری رہے۔
انہوں نے کہا کہ حکومت نے پیٹرولیم لیوی میں رد و بدل کے بعد پیٹرول اور ہائی اسپیڈ ڈیزل کی قیمت میں 55 روپے فی لیٹر اضافہ کرنے کا مشکل فیصلہ اس لیے کیا تاکہ ملک میں پیٹرولیم مصنوعات کی فراہمی متاثر نہ ہو۔
انہوں نے یہ بھی اعلان کیا کہ اب پیٹرولیم مصنوعات کی قیمتوں کا جائزہ ہفتہ وار بنیادوں پر لیا جائے گا اور عالمی صورتحال بہتر ہوتے ہی قیمتوں میں فوری کمی کی جائے گی۔
