اسلام آباد (ایم این این): ایران کی اسلامی پاسدارانِ انقلاب کی بحریہ نے خبردار کیا ہے کہ آبنائے ہرمز کے قریب آنے والے کسی بھی جہاز کو دشمن کے ساتھ تعاون تصور کیا جائے گا اور اسے نشانہ بنایا جا سکتا ہے۔
ایرانی سرکاری نشریاتی ادارے پریس ٹی وی کے مطابق جاری بیان میں کہا گیا ہے کہ خلیج فارس اور بحیرۂ عمان میں لنگر انداز کوئی بھی جہاز اپنی جگہ سے حرکت نہ کرے، کیونکہ آبنائے ہرمز کی جانب پیش قدمی کو دشمن کے ساتھ تعاون سمجھا جائے گا۔
بیان میں جہاز مالکان کو ہدایت کی گئی ہے کہ وہ صرف پاسدارانِ انقلاب کی بحریہ کے سرکاری ذرائع پر اعتماد کریں، جبکہ سابق امریکی صدر ڈونلڈ ٹرمپ کے بیانات کو ناقابلِ اعتبار قرار دیا گیا ہے۔
الجزیرہ کے مطابق ایران نے واضح کیا ہے کہ آبنائے ہرمز اس وقت تک بند رہے گی جب تک امریکہ اپنی بحری ناکہ بندی ختم نہیں کرتا۔
ایران کے اسپیکر قومی اسمبلی محمد باقر قالیباف نے امریکی ناکہ بندی کو “غیر دانشمندانہ اور ناتجربہ کار فیصلہ” قرار دیتے ہوئے شدید تنقید کا نشانہ بنایا۔ انہوں نے اسلام آباد میں ہونے والی پس پردہ بات چیت کی تفصیلات بھی بیان کیں، جن میں ایک امریکی بارودی سرنگ صاف کرنے والے جہاز کے ساتھ کشیدگی کا واقعہ بھی شامل تھا۔
ٹی وی انٹرویو میں قالیباف نے کہا کہ ایرانی حکام نے براہِ راست امریکی وفد کو خبردار کیا کہ آبنائے ہرمز اسلامی جمہوریہ ایران کے کنٹرول میں ہے۔ انہوں نے امریکی کارروائیوں کو جنگ بندی کی خلاف ورزی قرار دیتے ہوئے کہا کہ صورتحال کشیدگی کی جانب بڑھ رہی تھی۔
انہوں نے مزید کہا کہ دونوں فریق تصادم کے قریب پہنچ گئے تھے مگر آخرکار “دشمن پیچھے ہٹ گیا”۔ ان کے مطابق اسلام آباد میں انہوں نے امریکی وفد کو خبردار کیا کہ اگر ان کا جہاز اپنی موجودہ پوزیشن سے ذرا بھی آگے بڑھا تو اسے نشانہ بنایا جائے گا، جس کے بعد امریکی جہاز واپس ہٹ گیا۔
ادھر ایک اعلیٰ ایرانی عہدیدار نے سی این این کو بتایا کہ ایران آبنائے ہرمز سے گزرنے والے ان جہازوں کو ترجیح دے گا جو نئے قواعد پر عمل کریں اور سکیورٹی و حفاظت کی فیس ادا کریں۔
عہدیدار کے مطابق جو جہاز مقررہ فیس ادا نہیں کریں گے، ان کی گزرگاہ مؤخر کر دی جائے گی کیونکہ ایران محدود تعداد میں جہازوں کو گزرنے کی اجازت دینے کا ارادہ رکھتا ہے۔
