گلگت بلتستان (ایم این این): الیکشن کمیشن گلگت بلتستان نے اعلان کیا ہے کہ گلگت بلتستان اسمبلی کے عام انتخابات 7 جون کو ہوں گے، جو شدید موسمی حالات کے باعث چار ماہ کی تاخیر کا شکار ہوئے۔ یہ انتخابات ابتدائی طور پر 24 جنوری 2026 کو ہونا تھے، تاہم اعلان کے کچھ ہی دن بعد غیر معینہ مدت کے لیے ملتوی کر دیے گئے تھے۔
چیف الیکشن کمشنر راجہ شہباز خان نے نئی تاریخ کی تصدیق کرتے ہوئے کہا کہ بلدیاتی انتخابات کا شیڈول بعد میں جاری کیا جائے گا اور یہ عام انتخابات کے بعد ہوں گے۔
دوسری جانب گلگت بلتستان اسمبلی کے 24 حلقوں میں مجموعی طور پر 664 امیدواروں نے کاغذات نامزدگی جمع کرائے ہیں، جو بڑھتی ہوئی سیاسی سرگرمیوں کی عکاسی کرتا ہے۔ سب سے زیادہ امیدوار جی بی 2 گلگت (58)، جی بی 14 استور (57) اور جی بی 20 غذر (42) میں سامنے آئے۔ کاغذات نامزدگی کی جانچ پڑتال کا عمل جاری ہے، جس کے بعد حتمی فہرست جاری کی جائے گی۔
الیکشن کمیشن نے تمام متعلقہ حکام کو ہدایت کی ہے کہ شفاف اور منصفانہ انتخابات کے انعقاد کو یقینی بنانے کے لیے تمام قانونی تقاضے مکمل کیے جائیں۔ حکام کے مطابق امیدواروں کی بڑی تعداد عوامی دلچسپی اور سیاسی سرگرمیوں میں اضافے کو ظاہر کرتی ہے۔
