اسلام آباد (ایم این این): وزیر اعظم شہباز شریف نے فیلڈ مارشل عاصم منیر کے ہمراہ امریکی صدر ڈونلڈ ٹرمپ کا شکریہ ادا کیا ہے کہ انہوں نے پاکستان کی درخواست پر جنگ بندی میں توسیع کی تاکہ سفارتی عمل جاری رہ سکے۔
سماجی رابطے کی ویب سائٹ ایکس پر اپنے بیان میں وزیر اعظم نے کہا کہ پاکستان تنازع کے مذاکراتی حل کے لیے اپنی کوششیں جاری رکھے گا اور امید ظاہر کی کہ دونوں فریق جنگ بندی کو برقرار رکھتے ہوئے اسلام آباد میں ہونے والے دوسرے مرحلے کے مذاکرات میں جامع امن معاہدے تک پہنچیں گے۔ اس پوسٹ میں امریکی اور ایرانی اعلیٰ حکام کے سوشل میڈیا ہینڈلز کا بھی حوالہ دیا گیا۔
دوسری جانب امریکی صدر ڈونلڈ ٹرمپ نے بھی ایک سوشل میڈیا بیان میں کہا کہ فیلڈ مارشل عاصم منیر اور وزیر اعظم شہباز شریف کی درخواست پر امریکہ نے جنگ بندی میں توسیع اور فوجی کارروائی روکنے کا فیصلہ کیا ہے جبکہ صورتحال کے لیے افواج کو تیار رکھا جائے گا۔
یہ پیش رفت اسلام آباد میں متوقع دوسرے دور کے مذاکرات سے قبل سامنے آئی ہے، جہاں خطے میں پائیدار امن کے لیے سفارتی سرگرمیاں تیز ہو گئی ہیں۔
