اسلام آباد: پاکستان پیپلز پارٹی (پی پی پی) نے آزاد جموں و کشمیر (اے جے کے) میں ان ہاؤس تبدیلی لانے کا فیصلہ کر لیا ہے اور موجودہ وزیراعظم چوہدری انوار الحق کو ہٹانے کے بعد نئی حکومت بنانے کی تیاری کر رہی ہے۔
ذرائع کے مطابق صدر آصف علی زرداری نے پارٹی کی تجویز کی منظوری دے دی ہے جس کے تحت وزیراعظم کے خلاف عدم اعتماد کی تحریک لائی جائے گی۔
یہ فیصلہ اسلام آباد میں صدر زرداری اور چیئرمین بلاول بھٹو زرداری کی زیر صدارت ہونے والے مسلسل اجلاسوں میں کیا گیا۔
ذرائع کا کہنا ہے کہ نئے وزیراعظم کے لیے پارٹی رہنماؤں سے مشاورت کے بعد حتمی نام صدر زرداری طے کریں گے۔ امیدواروں میں چوہدری محمد یاسین اور چوہدری لطیف اکبر کے نام زیر غور ہیں۔
بلاول بھٹو زرداری پیر کے روز نئی حکومت کے قیام اور وزارتِ عظمیٰ کے امیدوار کا باضابطہ اعلان کریں گے۔
پیپلز پارٹی آزاد کشمیر کے رہنما چوہدری یاسین نے تصدیق کی کہ پارٹی نے اپنی حکومت بنانے کا ’’حتمی فیصلہ‘‘ کر لیا ہے۔
انہوں نے کہا کہ تمام پارلیمانی ارکان نے اجلاس میں شرکت کی اور تفصیلی مشاورت کے بعد اتفاق رائے سے فیصلہ کیا گیا۔
پارٹی قیادت نے اجلاسوں کے دوران موجودہ حکومت کی کارکردگی پر عدم اطمینان کا اظہار کیا اور متبادل سیاسی بندوبست پر غور کیا۔
اجلاس میں فریال تالپور، راجا پرویز اشرف، قمر زمان کائرہ، اسپیکر چوہدری لطیف اکبر، جاوید ایوب اور دیگر رہنماؤں نے شرکت کی۔
قمر زمان کائرہ نے میڈیا سے گفتگو میں کہا کہ آزاد کشمیر کی صورتحال تمام جماعتوں کے لیے تشویش ناک ہے۔ انہوں نے بتایا کہ مسلم لیگ (ن) اپوزیشن میں بیٹھنے کا فیصلہ کر چکی ہے مگر باضابطہ اطلاع نہیں ملی۔
کائرہ نے کہا کہ پیپلز پارٹی کے پاس قانون ساز اسمبلی میں مطلوبہ اکثریت موجود ہے، اگر موجودہ وزیراعظم مستعفی نہ ہوئے تو تحریکِ عدم اعتماد کامیاب ہو جائے گی۔
انہوں نے کہا کہ پارٹی کی حتمی حکمت عملی صدر زرداری کی زیر صدارت آئندہ اجلاس میں طے کی جائے گی، جس کے بعد بلاول بھٹو زرداری باضابطہ اعلان کریں گے۔
