اسلام آباد: پاکستان تحریک انصاف (پی ٹی آئی) نے سابق سی آئی اے افسر جان کیریاکو سے عمران خان کے خلاف جھوٹے بیانات دینے پر عوامی معافی کا مطالبہ کرتے ہوئے خبردار کیا ہے کہ اگر انہوں نے اپنے الزامات واپس نہ لیے تو پارٹی امریکی عدالتوں میں قانونی چارہ جوئی کا حق محفوظ رکھتی ہے۔
پی ٹی آئی کے مرکزی میڈیا ڈیپارٹمنٹ کی جانب سے جاری بیان میں کہا گیا کہ جان کیریاکو کے حالیہ انٹرویو میں عمران خان، سائفر اور امریکی سفیر کے بارے میں بے بنیاد، من گھڑت اور جھوٹے الزامات لگائے گئے جن کے حق میں کوئی ثبوت یا دستاویز پیش نہیں کی گئی۔
بیان میں کہا گیا کہ “پی ٹی آئی ان بے بنیاد دعوؤں کی سخت مذمت کرتی ہے”، اور یہ بھی واضح کیا گیا کہ جان کیریاکو کے سابقہ بیانات خود ان کے تضادات کو ظاہر کرتے ہیں۔
پی ٹی آئی نے وضاحت کی کہ اُس وقت کے پاکستانی سفیر اسد مجید نے امریکی حکام سے ملاقات کی تفصیلات باضابطہ طور پر دفترِ خارجہ کو ایک سرکاری سائفر کے ذریعے ارسال کیں۔
بیان کے مطابق، 2022 میں عمران خان نے بطور وزیر اعظم اس سائفر کے حقائق قومی سلامتی کمیٹی، پارلیمنٹ اور وفاقی کابینہ کے سامنے پیش کیے۔ بعد ازاں ریاستی اداروں نے اس معاملے کو تسلیم کیا اور امریکی سفارت خانے کو احتجاجی مراسلہ (ڈی مارش) بھیجا گیا۔
پارٹی نے کہا کہ عمران خان نے یہ معاملہ ذاتی یا سیاسی مفاد کے لیے نہیں بلکہ پاکستان کی قومی خودمختاری کے تحفظ کے لیے اٹھایا تھا۔
بیان میں مزید کہا گیا کہ جمیما خان کے پاکستان آنے یا عمران خان کی رہائی کے لیے حکومت سے کسی قسم کے رابطے کی خبریں بھی سراسر غلط اور گمراہ کن ہیں۔
پی ٹی آئی نے الزام لگایا کہ جان کیریاکو کے حالیہ انٹرویوز سیاسی لابیوں اور غیر ملکی مفادات سے متاثر معلوم ہوتے ہیں، اور ان کے اکثر بیانات بھارتی میڈیا میں نمایاں طور پر نشر کیے جاتے ہیں، جو ان کے تعصب کو واضح کرتے ہیں۔
پارٹی نے اعادہ کیا کہ عمران خان کا سائفر پر مؤقف پاکستان کی خودمختاری کے دفاع اور بیرونی مداخلت کی مخالفت پر مبنی تھا، جو ہر آزاد قوم کے رہنما کا بنیادی فریضہ ہے۔
