امریکی صدر ڈونلڈ ٹرمپ نے بدھ کے روز ایک بار پھر وزیر اعظم شہباز شریف اور پاک فوج کے سربراہ فیلڈ مارشل عاصم منیر کی تعریف کی اور کہا کہ دونوں رہنماؤں نے مئی میں پاکستان اور بھارت کے درمیان چار روزہ تنازع ختم کرانے میں اہم کردار ادا کیا۔
جنوبی کوریا کے شہر گیونگجو میں ایشیا پیسیفک اکنامک کوآپریشن (APEC) کے اجلاس کے دوران ایک ظہرانے سے خطاب کرتے ہوئے ٹرمپ نے بتایا کہ انہوں نے دونوں ایٹمی ممالک کے درمیان بڑھتی ہوئی کشیدگی کو ختم کرانے کے لیے براہِ راست مداخلت کی۔
انہوں نے کہا، "میں بھارت کے ساتھ تجارتی معاہدہ کر رہا تھا۔ میری نریندر مودی کے ساتھ بڑی عزت اور محبت ہے۔ اسی طرح پاکستان کے وزیر اعظم ایک بہترین انسان ہیں، اور فیلڈ مارشل — وہ ایک عظیم لڑاکا اور بہادر شخص ہیں۔”
ٹرمپ نے کہا کہ جب انہیں اطلاع ملی کہ دونوں ممالک ایک دوسرے پر حملے کر رہے ہیں اور سات طیارے مار گرائے گئے ہیں تو انہوں نے مودی اور پاکستانی قیادت دونوں سے رابطہ کیا۔ "میں نے مودی سے کہا، ہم تم سے تجارت نہیں کر سکتے اگر تم پاکستان سے جنگ شروع کر رہے ہو۔ اور پاکستان سے بھی یہی کہا۔ دونوں لڑنا چاہتے تھے، مگر دو دن بعد دونوں نے فون کر کے کہا کہ ہم سمجھ گئے — اور جنگ رک گئی۔”
ٹرمپ نے مودی کی نقل کرتے ہوئے کہا کہ "وہ خوش شکل آدمی ہیں مگر سخت مزاج اور طاقتور بھی ہیں۔”
امریکی صدر نے کہا کہ انہوں نے دونوں ممالک کو خبردار کیا تھا کہ اگر لڑائی جاری رہی تو وہ 250 فیصد ٹیرف عائد کر دیں گے۔ "میں نے یہ کہا اور 48 گھنٹوں کے اندر جنگ رک گئی، کوئی نہیں مرا۔”
یہ تنازع مئی میں اس وقت شروع ہوا جب مقبوضہ کشمیر میں ہندو سیاحوں پر حملے کا الزام پاکستان پر لگایا گیا۔ بھارت نے ثبوت پیش کیے بغیر الزام تراشی کی، جب کہ پاکستان نے ان الزامات کو جھوٹا اور سیاسی قرار دیا۔
چار روزہ لڑائی کے دوران دونوں ممالک نے لڑاکا طیارے، توپ خانہ اور ڈرونز استعمال کیے۔ پاکستان نے دعویٰ کیا کہ اس نے چھ بھارتی طیارے مار گرائے جن میں رافیل بھی شامل تھے، جب کہ بھارت نے صرف "کچھ نقصان” تسلیم کیا۔
بعد ازاں اقوام متحدہ کی جنرل اسمبلی سے خطاب میں وزیر اعظم شہباز شریف نے کہا کہ "پاکستانی فضائیہ نے بھارت کے سات طیاروں کو ملبے میں بدل دیا”، جو ٹرمپ کے بیان سے مطابقت رکھتا ہے۔
