اسلام آباد: گرین کلائمیٹ فنڈ (GCF) نے ایشیائی ترقیاتی بینک (ADB) کی قیادت میں تیار کردہ بڑے موسمیاتی منصوبے گلیشئرز ٹو فارمز کے لیے 250 ملین ڈالر کی منظوری دے دی ہے۔ یہ منصوبہ پاکستان، وسطی ایشیا اور جنوبی قفقاز کے ان علاقوں میں کام کرے گا جہاں گلیشئر کے پگھلنے والے پانی پر زرعی اور معاشی نظام انحصار کرتا ہے۔
اے ڈی بی کے مطابق یہ مالی معاونت، جو زیادہ تر گرانٹس کی صورت میں ہے، آئندہ دس سالوں میں بینک کے 3.25 بلین ڈالر کے اضافی فنڈز کے ساتھ استعمال ہوگی۔ یہ پروگرام نو ممالک — آرمینیا، آذربائیجان، جارجیا، قازقستان، کرغزستان، پاکستان، تاجکستان، ترکمانستان اور ازبکستان — میں نافذ کیا جائے گا، جہاں گلیشئر سے نکلنے والے دریا زراعت، پینے کے پانی اور بجلی کی پیداوار کا بنیادی ذریعہ ہیں۔
منصوبے کا مقصد آبپاشی کے نظام کو بہتر بنانا، پانی ذخیرہ کرنے کی صلاحیت میں اضافہ اور واٹر شیڈ مینجمنٹ کو مضبوط کرنا ہے تاکہ کسان خشک سالی اور سیلاب کے بڑھتے خطرات کے باوجود اپنی فصلوں کو برقرار رکھ سکیں، خاص طور پر شمالی پاکستان کے پہاڑی علاقوں میں۔
اے ڈی بی کی ڈائریکٹر یاسمین صدیقی نے کہا، "گلیشئرز کا تیزی سے پگھلنا ہمارے خطے کے لیے ایک پیچیدہ اور سنگین مسئلہ ہے۔ جی سی ایف کی مدد سے یہ منصوبہ کمیونٹیز کو عارضی حل سے نکال کر پائیدار حکمتِ عملیوں کی طرف لے جائے گا تاکہ آج اور مستقبل میں زندگیاں اور معاش محفوظ رہیں۔”
پاکستان میں منصوبہ سوات دریا کے طاس پر مرکوز ہوگا، جو تقریباً 2 کروڑ 70 لاکھ ہیکٹر رقبے پر پھیلا ہوا ہے اور 1 کروڑ 30 لاکھ سے زائد افراد، بشمول کسانوں اور دیگر کمزور طبقات، کو براہِ راست فائدہ پہنچائے گا۔ اس کے تحت گلیشئر اور موسمیاتی تجزیے، ابتدائی وارننگ سسٹم کی بہتری، اور گلیشئر جھیلوں کے پھٹنے یا طویل خشک سالی جیسے خطرات سے نمٹنے کے اقدامات شامل ہوں گے۔
اس منصوبے کے ذریعے زراعت کے علاوہ سماجی تحفظ، صحت کی سہولیات، اور مقامی بینکوں کے تعاون سے خواتین کی زیرِ قیادت کاروباروں کو بھی فروغ دیا جائے گا۔
جی سی ایف کے ڈائریکٹر تھامس ایرکسن نے کہا کہ "گلیشئرز ٹو فارمز ایک جدید اور مشترکہ کوشش ہے جو وسطی اور مغربی ایشیا کے ممالک کے لیے ایک ماڈل بن سکتی ہے تاکہ وہ پانی اور خوراک کے نظام کو موسمیاتی اثرات سے محفوظ بنا سکیں۔”
یہ منصوبہ 29 اکتوبر کو جی سی ایف کے 43ویں بورڈ اجلاس میں منظور کیا گیا، جو 2024 میں کیے گئے گلیشئر رسک تجزیوں کی بنیاد پر تیار کیا گیا ہے۔
ایشیائی ترقیاتی بینک، جو 1966 میں قائم ہوا، 69 رکن ممالک پر مشتمل ہے جن میں سے 50 ایشیا و بحرالکاہل کے خطے سے ہیں، اور یہ خطے میں جامع، پائیدار اور لچکدار ترقی کے فروغ کے لیے کام کرتا ہے۔
