عابدہ پروین کی صحت سے متعلق افواہوں کے بعد ایک اور غلط خبر نے سوشل میڈیا پر ہنگامہ مچا دیا۔ معروف گلوکارہ نصیبو لال نے ایسی افواہوں کی تردید کی ہے جن میں دعویٰ کیا گیا تھا کہ انہوں نے 56 سال کی عمر میں بچے کو جنم دیا ہے۔ گلوکارہ نے وضاحت کی کہ ان کے بیٹے کے ہاں اولاد ہوئی ہے اور وہ دادی بنی ہیں۔
افواہ اس وقت پھیلی جب نصیبو لال نے منگل کو ایک بچے کی تصویر شیئر کی اور لکھا: "بیٹے کے لیے کوئی خوبصورت اور منفرد نام تجویز کریں۔” لفظ "بیٹا” کو بعض سوشل میڈیا صفحات نے غلط طور پر سمجھا اور خبر پھیلادی کہ گلوکارہ نے خود بچے کو جنم دیا ہے۔
بعدازاں نصیبو لال نے ایک وضاحتی پیغام میں کہا: "اہم اعلان — جعلی خبروں سے دور رہیں۔” اگلے روز انہوں نے ایک اور پوسٹ میں تصدیق کی: "الحمداللہ میں دادی بن گئی ہوں” اور مداحوں کا شکریہ ادا کیا۔
نصیبو لال پاکستان کی مشہور پلے بیک گلوکارہ ہیں جن کا کیریئر 2000 کی دہائی کے آغاز سے جاری ہے۔ وہ اردو اور پنجابی دونوں زبانوں میں گانے گاتی ہیں اور کوک اسٹوڈیو کے سیزن 14 میں عابدہ پروین کے ساتھ گائے گئے گیت "تو جھوم” سے نئی شہرت حاصل کی۔
انہوں نے آئمہ بیگ اور ینگ اسٹنرز کے ساتھ "گروو میرا” بھی گایا، جو پاکستان سپر لیگ کے چھٹے ایڈیشن کا آفیشل ترانہ تھا، تاہم اس پر مداحوں کے ملے جلے ردعمل آئے۔
یہ واقعہ انٹرنیٹ پر پھیلنے والی غلط خبروں کی ایک اور مثال ہے۔ اس سے قبل عابدہ پروین کے حوالے سے جھوٹا دعویٰ سامنے آیا تھا کہ انہیں کینسر ہو گیا ہے، جس کی ان کی ٹیم نے سختی سے تردید کی اور بتایا کہ وہ بالکل صحت مند ہیں۔
